Hiuna Khombo Ten
Mission department hai changam tanjiu juringbo lutou lumak mai mathiu khuga mengjiu dintao khairaleng Phumling niu machun bonai pathao boga tenkiu tatkiu jiu bamme. Mission Department niu changam haisi, evangelists maksai missionaries kadabo, lang khaibo khatdi phui nkhi khaibo ngam haisi ten khaijiu bamme. Tuhoi tuhoi katang gu thiujiu chamai khang 11 (kariukhat) haisi lang khaijiu bamme.
Rangkang chalangu Tenkam
Rangkang chalan gu department haisiniu Phumling gu senlan kadaobo khatdi katatbo tenkam tatkiu jiu bamme. Phumling gu rangkang chalan kadibo katibo hina department niu thinjiu bamme.
Maipui Phom
Maipui phom hainiu Phumling ga disusan rabo khatdi malumbo npui tattiu khatdi lunlung ga nkiu lura matan jiu bamboo paphom khatle. Phumling hangga maipui dung gu thiujiu tamtambo changam tatkiu jiu bamme. Kahum chambo tenkam, seminar, maipui leng wirabo chamrang hina, kikhun ga tatlujiu kahum chambo ngam khatdi tamtambo tenkam hina tenkiu jiu bamme.
Chabon Phom
Chabon phom haisi Phumling gu chabonmai dung tu hiupuina lunlung ga disusan wisusan ra tenjiu bambo phom khatle. Tamtambo ngamkam - kahumchambo tenkam, seminar, music class kumbo, kam kamasanbo ngam khatdi tamtambo tenkam tatkiu jiu bamme.
Piubeng Phom
Piubeng phom haisi papiumai (panao thiumimai mathiu) leng khatdi mathiu leng pageng bamra tatkiu jiu bamboo paphom khatle. Papiu mai dung kikhun pao thiujiu kikhun wisan lura khatdi matipjiu bam lura leng jukhaira sukhaibo papiu dung gu paphom thiubowe.
Sunday School Ariaknamai Phom
Phumling gu disusan wisusan rabo khang kinbo tiangdi chabon mai ariaknamai phom khat thiuwe Sunday School Department hai. Nahmai dung aruang lujiu Tingwang lat lui katibom, thiubo khatdi paliu tu chamai thiuraleng kati kataam jiu bambo paphom khat thiubowe.
Platinum Jubilee Committee
Platinum Jubilee Committee maisi haisi khang 7 (chania) niu kathiubo phom khatle. Makhan Baptist Phumling haisi takum 75 (riakchania) changbo changee haisi paliu pen gasu manit lu mide. Paliu niu taten tanjiu wijiu tenkhaibo jeng niu tenkam hinasi wi tathui lumide. Pahangga paliu jan raokhai bamme:
1. Mahembui Abonmai – Chairman
2. Dinriliang – Secretary
3. Ab. Philip – Treasurer
4. Ml. Peter – Accountant
5. Ch. Wichamthiubou – Member
6. Th. Lunikamang – Member
7. Th. Kaihothutbou – Member